ದೂರದಲ್ಲೆಲ್ಲೋ ಥಳಥಳಿಸುವ ಚುಕ್ಕೆ ಚದುರಿದ ಆಗಸದ ಮನಮೋಹಕತೆಗೆ ಮಾನವ ಎಂದೋ ಮಾರುಹೋಗಿದ್ದಾನೆ. ಹೀಗೆ ಮನುಷ್ಯನ ಮನ ಸೋಲಲು, ಸಕಲ ಸಂಸ್ಕೃತಿಗಳ ಅವಿಭಾಜ್ಯ ಅಂಗ ಎನಿಸಿರುವ ಗ್ರಹತಾರೆಗಳ ದಂತಕಥೆಗಳೂ ಮಹತ್ವದ ಪಾತ್ರ ವಹಿಸಿವೆ. ಜನಸಾಮಾನ್ಯರಿಗೆಂದೇ ಬರೆಯಲಾದ ಈ ಹೊತ್ತಿಗೆಯೂ ಪುರಾತನ ಕಾಲದಲ್ಲೇ ಪ್ರಾರಂಭವಾದ ಆಕಾಶದ ನಕ್ಷೆ ರಚನೆಯಿಂದ ಪ್ರಾರಂಭಿಸಿ, ತಾರಾಶಿಶುವಿಹಾರಗಳಲ್ಲಾಗುವ ತಾರೆಗಳ ಹುಟ್ಟಿನತ್ತ ಹಣುಕಿ, ಕೊನೆಗೆ ಮುಪ್ಪಡರಿದ ತಾರೆಗಳು ಉರಿದು ಸಾಯುವ ನೋಟವನ್ನೂ ಕಂಡು ನಭೋಮಂಡಲದಲ್ಲಿ ನಡೆವ ತಾರೆಗಳ ಜೀವನವೆಂಬ ಬೆಡಗಿನ ನಾಟಕದ ತೆರೆ ಸರಿಸುತ್ತದೆ. ತಾರಾಂತರಂಗದೊಳಗಡಗಿರುವ ಗ್ರಹಕಾಯಗಳ ಗುಟ್ಟನ್ನು ಬೆದಕಿ ಅದ್ಭುತ ರಹಸ್ಯಗಳನ್ನು ಬಯಲಾಗಿಸುತ್ತದೆ.